«Առաջին կովկասյան տեղեկատվական» (ՊԻԿ) ռուսալեզու հեռուստաալիքի գլխավոր տնօրեն Ռոբերտ Պարսոնսը «Տաբուլա» ամսագրի հետ հարցազրույցում նշել է, որ վրացական մեդիայի գլխավոր խնդիրը հասարակության բևեռականացումն է: Ըստ Պարսոնսի՝ վրացական լրատվամիջոցները կա՛մ իշխանամետ են, կա՛մ հակակառավարական:

«Բոլորը շատ լավ տեսնում են, թե ինչ է կատարվում «Ռուսթավի 2-ում», «Մաեստրոյում» կամ «Կավկասիայում»: Նույն թեմայով ռեպորտաժներն այնքան տարբեր են ստացվում, որ դժվար է հավատալ, որ նրանք նույն իրադարձությունն են լուսաբանում», - ասել է Պարսոնսը և ընդգծել, որ անկախ այն բանից, թե որ ալիքում են աշխատում, վրացի լրագրողները մշտապես գտնվում են խմբագրության ազդեցության տակ: «Այն, ինչ դուք ունեք այսօր, կատարյալ աբսուրդ է. սա իրական տեղեկատվություն չէ: Պարզապես այս կամ այն տեսակետի քարոզ է՝ ուղղված հասարակությանը», - շեշտել է Պարսոնսը:

«ՊԻԿ»-ի գլխավոր տնօրենը կարծում է, որ կառավարությունն ամեն ինչ արել է՝ պատշաճ օրենքներ ընդունելու համար, սակայն մեդիայի առաջընթացի համար հիմա անհրաժեշտ է, որպեսզի կառավարությանը չխառնվի խմբագրական որոշումներում: Պարսոնսը պնդում է, որ ներկա վրացական հեռուստաալիքները «մեդիա դինոզավրեր են»: «Ես համոզված եմ, որ դրանք շուտով կվերանան», - ասել է նա և հույս հայտնել, որ շուտով ավելի անկողմնակալ և պատասխանատու լրատվամիջոցներ կհայտնվեն:

Պարսոնսը «Տաբուլային» հայտնել է նաև, որ դեկտեմբերին պատրաստվում է լքել Վրաստանը և աշխատել «France 24» հեռուստաալիքում:

Աղբյուր: Media.ge