2011 թվականը «Լրագրողներ հանուն ապագայի» համար աննախադեպ ակտիվ տարի էր: Կազմակերպված միջոցառումների շարքում էին սեմինարներ, իրավապաշտպանական նախաձեռնություններ, վարպետության դասեր, համաժողով և այլ նախագծեր: ԼՀԱ-ն շարունակեց նաև մեդիա ոլորտի դիտարկումներն ու լրագրողական ուսումնասիրությունները, որոնք հասանելի են JNews.am ԶԼՄ-ներին աջակցող հարթակի պահոցում:

Այս բոլոր նախաձեռնությունների հիմքում ընկած էր մեկ նպատակ` նպաստել Հայաստանում բազմակարծության տարածմանը, տեղեկատվության ազատության ապահովմանը և ԶԼՄ-ների նկատմամբ հանրության վստահության ավելացմանը:

Այս տարվա նախաձեռնություններից մի քանիսը նախորդ` 2010 թ-ին սկսած ծրագրերի տրամաբանական շարունակությունն էին: Դրանցից են «Համացանց. հաղորդակցության կայուն կամուրջ խուլերի համար» ծրագիրը և JNews.am ԶԼՄ-ներին աջակցող հարթակը, որոնց աջակցեց «Բաց հասարակության հիմնադրամներ Հայաստանը», ինչպես նաև «Նոր մեդիա դասընթացներ լրագրողական համայնքի համար» ծրագիրը, որն իրականացվեց Հայաստանում և Վրաստանում Նիդերլանդների դեսպանատան «Մատրա» ծրագրի և ԵԱՀԿ Երևանի գրասենյակի աջակցությամբ:

«Նոր մեդիա դասընթացներ լրագրողական համայնքի համար» ութամյսա ծրագիրն ավարտվեց 2011 թ-ի հունիսին: Այդ ընթացքում ԼՀԱ-ին հաջողվեց կազմակերպել 11 միջոցառում` 3 եռօրյա սեմինար, 3 մարզային դասախոսություն Գյումրիում, Գավառում և Գորիսում, 4 վարպետության դասախոսություն և մեկ տարածաշրջանային համաժողով: Բոլոր միջոցառումներին, ընդհանուր առմամբ, մասնակցեց շուրջ 180 հոգի` մեդիա փորձագետներ, լրագրության դասախոսներ, մարզերի և մայրաքաղաքի լրագրողներ, ուսանողներ և քաղաքացիական ակտիվիստներ: Սեմինարների ու վարպետության դասերի մեդիա փորձագետներն էին` Ռուսաստանից` Իվան Զասուրսկին և Գրիգորի Շվեդովը, իսկ Հայաստանից` Արթուր Պապյանը, Սամվել Մարտիրոսյանը և Գայանե Միրզոյանը:

Ծրագրի ամփոփիչ համաժողովին ներկա էին մոտ 30 մեդիա փորձագետներ` Հայաստանից, Վրաստանից և Ռուսաստանից:

Նույն ծրագրի շրջանակներում ստեղծվեց Ditaket.blogspot.com մարզային լրատվական փորձարարական հարթակը, որն առաջին երկու ամիսների ընթացքում ունեցավ 25000 այցելու: Ստեղծվեց նաև Tmtarmenia.blogspot.com մասնագիտացված բլոգը` լրագրություն դասավանդողների համար:

Ամենակարևոր ձեռքբերումներից էր նաև «Նոր մեդիա գործիքներ» առարկայի մշակումը, որն այժմ ընդգրկվել է Երևանի պետական բուհերից մեկի լրագրության բաժնի ուսումնական ծրագրում:

Իսկ «Համացանց. հաղորդակցության կայուն կամուրջ խուլերի համար» ծրագրի շնորհիվ 22 լսողության խանգարում ունեցող քաղաքացիներ ութ ամիսների ընթացքում սովորեցին օգտվել նոր մեդիա գործիքներից և ստացան լուսանկարելու հմտություններ: Կազմակերպվեցին հատուկ հանդիպումներ ծրագրի մասնակիցների և հասարակական սեկտորի ներկայացուցիչների և լրագրողների միջև:

Այս ծրագրի շնորհիվ առաջին անգամ Հայաստանում ստեղծվեց Deafnet.blogspot.com առցանց լրատվական հարթակը, որը ներկայացնում է Հայաստանում խուլերի և լսողության խանգարում ունեցող համայնքի խնդիրներն ու իրադարձությունները: Այստեղ ընդգրկված է նաև այն կազմակերպությունների տվյալների բազան, որոնք գործունեություն են ծավալում լսողության խանգարում ունեցող անձանց համար:

Խուլերի համայնքի համար առցանց էջեր բացվեցին նաև Twitter-ում, Picassa-ում, Facebook-ում և այլ սոցիալական հարթակներում: Հատկապես մեծ հաջողություն է ունեցել ֆեյսբուքում բացված «Լռության ձայն» էջը: Այս պահին այն ունի մոտ 300 անդամ, և այստեղ են հիմնականում ծավալվում լսողության խանգարում ունեցողների խնդիրներին վերաբերող քննարկումները: Վեց ամիսների ընթացքում «Լռության ձայն» էջի պատին եղել է մոտ 1400 քննարկում, որոնք մոտ 50,000 դիտում են ունեցել:

Պետք է նշել, որ այս ծրագրի ընթացքում ԼՀԱ-ն սկսեց մի հավելյալ նախաձեռնություն, որն ուղղված էր Հայաստանում լսողության խանգարում ունեցող քաղաքացիների տեղեկացված լինելու իրավունքի վերականգնմանը: Ողջ տարվա ընթացքում շարունակվող նախաձեռնության հիմնական նպատակն էր Հանրային հեռուստաընկերության եթերում ժեստերի լեզվով ուղեկցվող լրատվական հաղորդումների հեռարձակումը: Նախաձեռնությունը սկսվեց 2011թ-ի հունվարի 18-ին ՀՌԱՀ նախագահ Գրիգոր Ամալյանին բաց նամակ հղելով և մինչ օրս շարունակվում է հրապարակային միջոցառումներով:

12 ամիսների ընթացքում տեղական տպագիր, առցանց և ռադիո ԶԼՄ-ներն ու բլոգերները այս խնդրին անդրադարձել են ավելի քան 70 անգամ: Բայց այն այդպես էլ անտեսված մնաց հայկական հեռուստաընկերությունների կողմից, որոնք այդպես էլ չկարևորեցին խուլերի տեղեկացված լինելու իրավունքը:

Այնուամենայնիվ, ԼՀԱ-ի այս նախաձեռնության հիման վրա ԱԺ-ն ընդունեց մի օրինագիծ, որով սահմանեց, որ Հանրային և բոլոր մասնավոր հեռուստաընկերությունները պարտավոր են ունենալ ժեստերի լեզվով կամ հայերեն լուսագրերով լրատվական հաղորդումներ:

Թեպետ դեռևս չկա ժեստերի լեզվով հեռարձակվող լրատվական հաղորդում, և պարզ չէ` արդյոք որևէ հեռուստաընկերություն նման հաղորդում կկազմակերպի իր եթերում, սակայն այս նախաձեռնության շնորհիվ հնարավոր դարձավ հանրության ուշադրությունը գրավել դեպի Հայաստանում բնակվող լսողության խանգարում ունեցող քաղաքացիների խնդիրները:

Իսկ վերջում թվերի միջոցով ներկայացնենք JNews.am ԶԼՄ-ներին աջակցող հարթակի հաջողությունները.

• Շուրջ 1000 հոդված անգլերեն և հայերեն լեզուներով Հայաստանի և հարևան երկրների մամուլի իրավիճակի, ինֆորմացիայի ազատության և լրագրողական միջոցառումների մասին,
• Մոտ 20 լրագրողական ուսումնասիրություն և հետաքննություն,
• 2011 թ-ի հունվար-դեկտեմբեր ամիսների ընթացքում մոտ 65,000 դիտում աշխարհի 100 երկրներից (Google-ի վիճակագրություն)
• JNews.am-ի ֆեյսբուքի էջն ունի 650 անդամ (հիմնականում մեդիա ոլորտի ներկայացուցիչներ): Այն շաբաթական դիտում է միջինը 1500 օգտատեր: Իսկ մեկ տարվա ընթացքում ֆեյսբուքում տեղադրված նյութերը դիտել են ավելի քան 200,000 անգամ:

2011թ-ին դրվեց նաև նոր նախաձեռնությունների սկիզբ, որոնց իրականացումը կշարունակվի արդեն հաջորդ` 2012թ-ին: Նոր տարում ԼՀԱ-ն կշարունակի սատարել խոսքի ազատության և բազմակարծության տարածմանը Հայաստանում: Մեր ուշադրության կիզակետում կլինեն Հայաստանում Ազգային ժողովի ընտրությունների լուսաբանումը տեղական ԶԼՄ-ների կողմից, հեռուստատեսության թվայնացման և էլեկտրոնային կառավարման անցումային գործընթացները:

Վերը թվարկված միջոցառումների իրականացումը և ցանկացած հաջողություն անհնար կլիներ առանց մեր ծրագրերի մասնակիցների, գործընկերների և աջակիցների, որոնց հայտնում ենք մեր շնորհակալությունը:

Այս մեկ տարին հագեցած էր դժվար օրերով ու բազմաթիվ հաղթանակներով, և դրա շնորհիվ է, որ 2012 թ. մուտք ենք գործում շատ ավելի հասուն, փորձառու և պատրաստ իրականացնելու դրական փոփոխություններ նոր տարում:

Շնորհավոր Ամանոր և Սուրբ Ծնունդ:

Լավագույն բարեմաղթանքներով`

Սուրեն Դեհերյան

Լրագրողներ հանուն ապագայի ՀԿ նախագահ