The spam filter installed on this site is currently unavailable. Per site policy, we are unable to accept new submissions until that problem is resolved. Please try resubmitting the form in a couple of minutes.
Մարդ
Նոյեմբեր 28, 2017
Ձգտելով հոգևոր հանգստության
Վերոնիկա Քեշիշբանոսի ֆոտոարխիվից

19-ամյա Վերոնիկա Քեշիշբանոսը «Հայաստանի ձայնը» հեռուստանախագծի մասնակիցներից է: Ասում է՝ երաժշտական կրթություն չունի, բայց երգում է այն պահից, ինչ սկսել է խոսել: Երգի ասպարեզում առայժմ վաղ է ասել` ինչ հաջողությունների կհասնի, սակայն հիմնական մասնագիտության առումով նա արդեն կատարել է իր ընտրությունը: Վերոնիկան սովորում է ԵՊՀ Փիլիսոփայության և հոգեբանության ֆակուլտետում: Նա 7 տարեկանից հաճախում է լողի, իսկ 12 տարեկանում դարձել է բուսակեր, այնուհետեւ սկսել է զբաղվել նաեւ յոգայով: Ասում է, որ չի խճճվում այս ամենում: Վերոնիկան հավատացած է, որ նման ակտիվությունը նրան հաջողվում է բուսակերության շնորհիվ:

-Ինչո՞ւ որոշեցիր բուսակեր դառնալ:

- 12 տարեկանում պատրաստվում էի մասնակցել Հայաստանում լողի մրցույթի: Ինձ թվում էր, որ ես ֆիզիկապես այնքան էլ լավ մարզավիճակում չեմ եւ պիտի մի փոքր քաշս նվազեցնեմ: Այդ պատճառով որոշեցի միսը բացարձակ հանել սննդակարգիցս: Մի քիչ երեխայական բան կար այդ ամենում, բայց որոշումս ճակատագրական դարձավ:

- Օգնե՞ց:

- Բավականին, նաև ֆիզիկական ուժ տվեց: Երկրորդ տեղ գրավեցի:

289

- Նման կտրուկ փոփոխության դիմելը, այն էլ այդ տարիքում, սովորական որոշում չէ: Ընտանիքն ինչպե՞ս արձագանքեց:

- Ծնողներս սկզբում կտրականապես դեմ էին: Հիմա էլ չեն աջակցում, բայց մի փոքր հարմարվել են: Հատկապես հայրիկիս հետ շատ բախումներ էինք ունենում մինչ այն պահը, երբ նրա ընկերներից մեկը, ով նույնպես բուսակեր է, իմացավ իմ պատմությունը և համոզեց չարգելել ինձ այն, ինչն օգտակար է:

- Բժիշկների հավաստմամբ՝ երեխաներին, մինչև 16 տարեկաններին և հղիներին արգելվում է դառնալ բուսակեր: Ձեր որոշումը առողջական որևէ խնդրի չի՞ հանգեցրել:

- Ոչ, տարին մի քանի անգամ ստուգումներ եմ անցնում ու իդեալական առողջ վիճակում եմ: Բուսակերությունը միայն դրական ազդեցություն է ունենում առողջությանս վրա, չնայած՝ հորեղբայրս բժիշկ է և ինքն էլ է կտրականապես դեմ:

- Բուսակերությունը դիետա՞ է, թե՞ կենսակերպ:

- Իհարկե կենսակերպ: Երբևէ չեմ համարել, որ ճիշտ սննդակարգը դիետա է: Կա տարածված կարծիք, թե պիտի ուտես այն, ինչ քո օրգանիզմը պահանջում է: Ո՛չ, շատ հաճախ մեր օրգանիզմը պահանջում է այն, ինչը օգտակար չէ:

- Միս չուտող մարդիկ հիմնականում հաբեր են ընդունում, որոնք լրացնում են օրգանիզմին անհրաժեշտ նյութերը: Դրանք կարո՞ղ են օգտակար լինել:

288

- Իմ հաբը նուշն է և դա մսի հիմնարար փոխարինողն է: Ես գնում եմ մարզասրահ, հետո ուտում եմ 5-6 նուշ ու դա իմ մեկ շաբաթվա էներգիան ապահովում է:

- Կնշե՞ք մի քանի կետ, որոնք կհիմնավորեն բուսակեր լինելու անհրաժեշտությունը:

- Առաջինն ու ամենակարևորը՝ առողջությունը. առողջ մարմնում կա առողջ հոգի, դա փաստ է: Երկրորդը՝ կենդանիների պաշտպանությունն է. ես կատեգորիկ դեմ եմ կենդանի ուտելուն, նաև հոգևոր հանգստությունը: Սրանք այն 3 կետերն են, որոնք ինձ ուժ են տալիս դիմակայելու մեր հասարակության մեջ, որովհետև այն շատ անհանդուրժող է յուրաքանչյուր փոփոխության, ալտերնատիվ մտածելակերպի հանդեպ:

- Ի՞նչ կոշիկ եք հագնում:

- Ես կաշվե իրեր չունեմ (ժպտում է): Շոփինգի և գեղեցիկ հագնվելու մեծ սիրահար եմ, չգիտեմ՝ որպես աղջիկ ապագայում կամքս կկոտրվի, թե ոչ, բայց հիմա կաշվե, մորթե իրեր չեմ կրում:

- Չե՞ք վիրավորվում, երբ ցանկացած միս չուտող իրեն բուսակեր է որակում: Չէ՞ որ բուսակերությունը ավելի լայն հասկացություն է:

- Հիմա տենդենց կա 20-25 տարեկան աղջիկների մոտ, ովքեր ասում են, թե բուսակեր են, չեն ուտում միս՝ կենդանիների պաշտպանության համար: Մի ամիս հետո կարող ես այդ մարդկանց հագին տեսնել ամենաշքեղ մուշտակները: Միայն ասել՝ ես բուսակեր եմ ու անցնել մի կողմ՝ ընդունելի չէ: Չեմ վիրավորվում, բայց, ամեն դեպքում, տհաճ է:

- Ամանորը մոտ է: Բլինչիկի, խոզի ազդրի և մսային այլ ուտեստների առկայությունը խանգարո՞ւմ է Ձեզ լիարժեք վայելել այդ տոնը:

- Մենք նույնպես չենք կարող զերծ մնալ խնջույքներից, ընտանեկան հավաքույթներից, ու ես այդ ամենը շատ եմ սիրում, երբեք ինձ չեմ զրկում: Ուղղակի ունեմ այլընտրանքային տարբերակներ: Օրինակ, երբ բոլորը բլինչիկ են ուտում, ես ուտում եմ ձավարեղենով պատրաստված ուտեսներ:

- Քանի որ հասանք տոներին, պատմեք նաև, թե ինչպե՞ս եք անցկացնում բուսակերության միջազգային օրը՝ նոյեմբերի 1-ը:

291 - Այդ օրն ամենահամեղ ճաշատեսակներն եմ պատրաստում: Իմ գուրուին (յոգայի ուսուցչին) եմ շնորհավորում: Ինքն ինձ ցույց տվեց այս ուղին, սովորեցրեց՝ ինչպես կարող ես հասնել ինքդ քեզ հետ ներդաշնակության ու հասկանալ քեզ:

- Յոգան մարմնամարզությո՞ւն է, կրո՞ն, մտածելակե՞րպ, թե՞ ուրիշ ինչ-որ բան:

- Երբ իմանում են՝ յոգայով եմ զբաղվում, մտածում են՝ կամ բուդիզմի հետևորդ եմ, կամ հինդուիզմի կամ ջայինիզմի: Յոգայի մեջ ես տեսնում եմ քրիստոնեությունը, իրար չվնասելը, հասկացված, ներդաշնակ լինելը, հանգստությունը: Բայց ինձ համար յոգան կրոն չէ, ես կարող եմ դա հստակորեն ասել: Այն ապրելակերպ է, նաև՝ ֆիզիկական ուժ տվող հիմնական աղբյուրը:

- Հոգեբանություն, բուսակերություն ու յոգա. ի՞նչ կապ ունեն այս ամենը միմյանց հետ:

- Շատ ուղիղ համեմատական կապ ունեն: Հոգեբանի կյանքում շատ կարևոր է լինել հավասարակշռված, հանգիստ մարդ: Յոգան ու բուսակերությունը ինձ օգնում են լինել հենց էդպիսին: Յոգան ինձ մի բանում էլ է օգնել. ամեն ինչին նայել խորությամբ: Մենք առօրյա վազքի մեջ չենք նկատում բաներ, որոնք պիտի նկատեինք, իսկ իրականում մանրուքներն են մեզ արժեքավոր մարդ դարձնում:

- Բուսակերությունը և յոգան Ձեզ համար միահյուսվա՞ծ են, թե՞ կարող են լինել նաև առանձին:

- Միահյուսված չեն: Միգուցե գա ժամանակ, որ յոգայով չզբաղվեմ, բայց որ բուսակերությունը թողնեմ, երբեք:

Հեղինակ՝ Արուսյակ Կապուկչյան, ԵՊՀ Ժուռնալիստիկայի ֆակուլտետ, 2-րդ կուրս 

Լուսանկարները` Վերոնիկա Քեշիշբանոսի ֆոտոարխիվից 

Աղբյուր՝ JNews.am

Share
Printer-friendly version
PDF version

Թեմատիկ նյութեր

Մեկնաբանություններ

Մեկնաբանել